台語出名人
頂港有名聲
下港上出名
阮是台語人
咱出名人ê筆，lóng寫咱自己ê話。
這是屬於台灣人ê文學空間，mā是講自我、寫歷史ê所在。Tī台灣文學發展ê天河中，台語文學也bat是儼硬koh有韌性ê草根力量。當濟濟人koh leh憢疑台語kám有書寫系統ê時，其實台語書寫ê實踐早就超過百外冬--ah，koh展現出豐富多元ê文學風貌。
為著thap教育體系內台語文學教材欠缺ê空，koh提供khah濟多元ê母語資源，阮執行國科會「跨領域社會需求計畫：以AI元宇宙系統起造國家語言教育的韌性」，起一座接過去thàng未來ê數位橋樑——「www.taigiedu.tw 台語共融教學平台」。Tī這個平台，「台語出名人——頂港有名聲 下港上出名」ê單元是扮演知識體系ê核心。阮相信，叫醒母語自尊ê第一步，就是重新認bat hia--ê堅持提筆書寫ê先行者。Tī 1920到30年代，台灣早就有母語文學ê自覺運動。黃石輝bat tī鄉土文學論戰中喊huah：
「你是臺灣人……你的那枝如椽的健筆，生花的彩筆，亦應該去寫臺灣的文學了。」蔡培火mā tī追求台灣人尊嚴ê歷程中，主張咱應該ài有「做一個完整的人」ê權利，koh積極推sak白話字，當作是普及知識kap啟蒙思想ê重要工具。這種對自我價值ê肯定，拄好kap王育德所強調ê「語言是民族的靈魂」相對應。這股草根實踐ê力頭，正正是kīng台語經歷風霜歲月ê關鍵。本平台上大ê特色，是beh起造一個正經ē-tàng「閱讀kap傳承」ê空間。阮m̄-nā提供作家ê生平紹介，koh知文學ê生命力是來自「被閱讀」。所擺，計畫團隊擴大整合《台語文學史暨書目彙編》、《台語文學導論》、《台語現代散文選》、《文學年鑑》，kap《海翁文庫台語文學大系》等重要資源，優先收錄重複性懸、hông引用khah濟ê作品。同時，阮有作家kap家屬ê授權，照無仝ê授權型態，開放作品全文閱讀kap下載，予典雅ê台文進入教學現場，成做重要ê補充教材。收錄ê作家包括早期白話字推sak者巴克禮、戴仁壽；理論kap實踐先驅王育德、林茂生、蔡培火；kap當代持續創作ê林宗源、陳明仁、林央敏、胡民祥、王昭華、陳正雄、陳雷等。每一位作家lóng是一粒星，照光咱台語文ê歷史穹蒼。透過AI科技，咱予tsia--ê文學靈魂tī元宇宙中重新展現生命力。邀請社會大眾行入這個閱讀空間，感受台語文hānn過百冬ê思想熱度kap文字溫度。