蔡培火（1889.5.22—1983.1.4），tī 北港出世，是社會運動、作家佮政治人物，一世人bat 經歷過清國時代、日本時代佮中華民國 ê 變換。伊自1902年開3工 ê 時間學會曉白話字了後，tō 成做是伊一生 tshui-sak 台語志業 ê 起鼓。伊 siāng 出名 ê 作品《十項管見》（Cha̍p-hāng Koán-kiàn），tī 1925年家己出錢出版，用羅馬字書寫對台灣人民 ê 前途佮向望，後來 tī 2023年台灣文學館20週年 ê「鎮館之寶」評選當中得 tio̍h 頭等。 伊 uì 日本時代 tō gâu 舞政治，盡力 tshui-sak「台灣議會設置請願運動」，主張「台湾は⋯⋯我等台湾人の台湾である（台灣是台灣人 ê 台灣）」，透過普及台灣話 ê 讀寫來 hōo 台灣人認識智識，m̄-bián 倚靠漢文抑是日文。伊 uì 日本時代到戰後，bat tshui-sak 白話字、日文假名台語、注音台語。咱 thang uì 伊 ê 筆記、日記佮著作當中，看 tio̍h 伊 tī 無仝 ê 政權佮時代用無仝 ê 文字書寫系統來 sak 台灣話 ê 意志。 M̄-nā 台灣議會設置，伊 koh 參與台灣文化協會、台灣民眾黨、台灣地方自治聯盟等政治運動，發展屬於台灣人 ê 刊物佮報紙，參與《台灣青年》、《台灣民報》、《台灣新民報》ê 編輯佮規劃。戰後，蔡培火加入國民黨，成做是國民黨吸收台灣人 ê 象徵，雖然伊 beh tshui-sak 台語 ê 意志並無改變，可惜無權、最後 mā 無成功。雖罔有位，suah 無法度 thang 實踐家己 ê 理想。